بلياك ما اعيش

بليّاك ما عيش اليكَلّك عشت
بعيوني احلفك منّة تاخذ حذر

آنه إطمئن يمّك وإذا تبتعد
من كلشي يمّي آنه أحس بخطر

إللّيل يدري شكَد أحبّك لإن
ويـّاك عيني تستلذ بالسهر

أذبل .. لحد ما أرتوي بشوفتك
جـن سنبلة الروح وعشرتك نهر

أبلياك كلشي يصير ما بي طعم
ما ميّز ابّين الورد والصخر

تمطر ترافة وانه اخضّر غزل
وبكَاع جفّي قلمي يطرح ثمر

لو راد ياخذني القدر كلّي إله
بس لا ابّيني وبينك ايمر قدر

علّمت روحي من زغر شوفتك
ردتك صدكَ تبقى نقش ع الحجر

تشتاكَ الك عيني اذا سافرت
مثل النوارس من تحن للبحر

آنه شأسوي بالنظر لو رحت ؟
من تمشي كَللي .. حتى اضمّة النظر

مادوّر ابحبّك خسارة وربح
ما فكّر بكَلبي ربح .. لو خسر

كل اليهمني آنه احبّك فقط
حب لونه صافي ... أبيض امن الكَمر

طير انته من مر بسمه دنيتي
وكّر على روحي وعلى كَلبي استقر

يسكت غصن خلكَي كَبل لا تجي
ينتظرك الريح التحرك الشجر

ابليّاك كَلبي ايصير ما بي نفع
شيفيد كَللي الغيم البلا مطر

عين الأشوفك بيها احس تختلف
مو نفس عيني البيهه اشوف البشر

مرّات احجّي صورتك ع الورق
من اخلط احساسي ويه لون الصور

أمشي بحياتي .. وإمعن بخطوتك
حته امن اتيهك ع الاقل الكَه اثر

آنه امن اعوفك جدمي يمشي بثكَل
ثكَل الجدام المالــّه امن السفر

ومن تمشي عنّي الكون احس يختنكَ
والعالم ابكبرة احس بي زَغر

بس لمّن اتردلي اردّ اكتشف
كل شي بمكانه ... وإنته حبــّك كبر !!