منتديات الجنة

هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
منتديات الجنة

منتديات الجنة منتدى عراقي يهتم بالطلبة العراقيين والشباب العراقي ... منوع اجتماعي خدمي


5 مشترك

سيدنا محمد صلي الله عليه وسلم جاي يزور شارعنا

السيد ابو اليسر
السيد ابو اليسر
.::عضو نشيط جدا::.
.::عضو نشيط جدا::.


الجنس : ذكر
الانتساب الانتساب : 21/05/2010
العمر العمر : 32
المساهمات المساهمات : 288
نقاط التميز نقاط التميز : 612
تقيم المستوى تقيم المستوى : 1

default سيدنا محمد صلي الله عليه وسلم جاي يزور شارعنا

مُساهمة من طرف السيد ابو اليسر 2010-05-22, 7:53 pm

الشخصيات
[صادق- محمود- المعلم رضا- امين المرتشي - مصطفي - السيد - الشيطان - حمادة]
تفتح الستار علي الشيطان معطيا ظهره للناس ويستدير ببطئ تجاه الجمهور محدثا إياهم
:الشيطان: هاهاها ... أيوة كدة كله ماشي تمام .. ماشي زي ما أنا عاوز .. ايوة اعصوا كمان وكمان ... اغرقوا في الذنوب والمعاصي .. انسوا ربنا كمان وكمان .. اصل مش معقول أحلف بعزته إني أغويكم وأزين لكم الشر واحد واحد وبعدين ما أبرش بقسمي ده .. يعني يرضيكم ؟؟ يرضيكم أدخل جهنم لوحدي؟؟ أوعوا تقولوا لأ .. أنا شايف نظرات الكره في عنيكم .. بس أقوللكم .. أنا مش هادخل النار لوحدي ..علشان أنتوا لسة ياما هتشوفوا مني ..إيه ده في حد جاي .. لما أشوف شغلي بقي .. علي رأي المثل الإيد البطالة نجسة ..
المعلم راضي : قلت إيه يا بيه ؟؟ ما تتعبنيش معاك بقي ..
أمين : في إيه يا معلم راضي ؟؟
المعلم : ها نقول تاني ياباشا ؟؟ (متلفتا) خمس بواكي بس تخلص لنا المصلحة دي
امين : أيوة يا معلم بس.....
المعلم : وحدووووه .. النبي عليك يا شيخ ما انت قايل حاجة .. يالله سمي كده وصلي علي النبي ومد إيدك دول عليهم برفان ...
امين : إيه ده .. رشوة يا معلم .. بتعرض عليا أنا رشوة .. هي حصلت يا معلم .. لا خد بالك دانا محترم أوي ..ونضيف أوي ..انا آخد رشوة ..أنا أمد إيدي علي رشوة ..كام الرشوة ؟؟
المعلم : أتفضل .. خمس بواكي مكنفين .. ودول طبعا كادو يعني مش رشوة ...
امين : يا معلم كادو وللا جاتوه .. تعددت الأسماء والرشوة واحدة .. المهم حطهم في جيبي علشان أنا متوضي
المعلم : اللهم صلي علي النبي .. طاهر طول عمرك طاهر يا أستاذ أمين .. خلاص مش هاوصيك يا باشا امين : يا معلم ماتقولشي كدة .. أعتبر الموضوع منتهي
المعلم : كسبنا صلاة النبي .. يا ميت نجف علي تفتيح الدماغ .. وحدوووووه
الشيطان : هاهاها ..يا سلام عليك ياواد يا إبليس ما خدوش في إيدي خمس دقايق يا دوبك زينت لأمين القرش والمال الحرام وفكرته بالزنقة إللي هو فيها فخد الرشوة علطول ..رشوة إيه ؟؟ ودي تيجي إيه جنب إللي عملته أنا صاحب إنجازات برضه يا جماعة (مفتخرا) أنا بلا فخر إللي أغويت الأخ أبو جهل والأخ أمية بن خلف يعني شوية البني آدمين دول مش هغلب فيهم .. البني آدمين دول حاجة غريبة قوي .. عارفين إن رزقهم موجود وربنا ضامنهلوهم والحلال بركة ..ورغم كدة يصدقوني أنا وما يصدقوش ربنا.. ياللا أمال أنا هاشتغل إزاي .. ما هو لازم كله يتحرق ..كله يتشوي .. فيه حد تاني جاي .. إظاهر النهاردة إستفتاحي زقوم عا الآخر
مصطفي : إيه يا بو السيد عامل إيه ؟؟ وعيالك عاملين إيه ؟؟
السيد : كله تمام والحمد لله .. بس العملية مقصرة معايا حبتين
مصطفي : ليه كدة بس ؟؟
السيد : البنات يا سيدي .. داخل علينا الصيف وقال إيه عاوزين لبس جديد ..
مصطفي : وإيه المشكلة يعني
السيد : المشكلة إن لبسهم ده عجيب قوي .. ومكلف جدا .. بس مضطر .. سلو بلدنا كدة ..يعني شوف عندك الإستريتش الواحد بيتكلف كام؟؟ وللا البادي.. ودول بنتين يا مصطفي يا خويا.. بنتين
مصطفي : طيب بس بس صلي علي النبي .. إيه ده أهو صادق جه أهو
صادق : السلام عليكم
الجميع : وعليكم السلام .. أهلا يا صادق .. كويس إنك جيت .. أنت مش خريج تجارة ؟؟
صادق : خير يا جماعة فيه إيه ؟؟
مصطفي : خلاص يا عم روق .. صادق هايعمل لك ميزانية ..
صادق : أنا مش فاهم حاجة ابدا .
مصطفي : الحكاية يا سيدي إن بنات السيد عايزين لبس جديد علي الصيف وهو محتار لأن زي ما انت عارف لبس البنات مكلف .
صادق : ما هو إحنا إللي معذبين نفسنا .. إنت عيالك عندهم كام سنة يا سيد ؟؟
السيد : الكبيرة 20 والصغيرة 18 وعندي حمادة أخر العنقود .
صادق : يا سيدي ربنا يخلي ..طيب ما هي بسيطة .. البنت محتاجة إيه غير الحجاب علي الراس والفستان الطويل
السيد : أيوة يا صادق بس العيال من حقهم يتمتعوا ويعيشوا حياتهم زي زمايلهم في الجامعة .
صادق : غلط يا سيد .. الأصل هي طاعة ربنا .. وربنا بيقول فليضربن بخمرهن علي جيوبهن .. يعني لما تحجب بناتك بتصونهم و في نفس الوقت بتطبق شرع ربنا وتبقي قدوة لغيرك يا أخي .
السيد : يا صادق يعني هو لازم حجاب .. البنت يا أخي متربية ومحافظة علي نفسها .صادق :لا حول ولا قوة إلا بالله . يا سيد الحجاب شرع ربنا ومادام ربنا قال يبقي لازم نسمع .
مصطفي : يا صادق يا أخويا العمر قدامهم .. يتجوزوا وبعدين ربنا يحلها .
صادق : هوه أنا علشان أجوز بنتي يا مصطفي لازم أخليها تمشي عريانة للرايح والجاي يتفرج عليها .. وبالفرض لو أتقدملها عريس وهي بالشكل ده هارفضه طبعا .
السيد : يا راجل قول كلام غير ده .صادق : زي ما بقول لك كدة يا سيد .. لأنه وقت ما يزهق منها هيرميها رمية الكلاب .. إنما إلا يخبط علي بابي وهو عاوز بنتي علشان حشمة ومحجبة وعلي دين .. هو ده بصحيح الراجل إللي عاوز يفتح بيت وهو ده إللي أستأمنه علي بنتي .
مصطفي : كلام مظبوط وعلي دماغنا .. بس مايبقاش بتزمت كده .
السيد : أيوة .. وبعدين الدين مش بالشكل ده .. ده ربك رب قلوب يا اخي .
صادق : (يضحك) أنتوا عارفين إنتوا فكرتوني بمين ؟؟
الجميع : بمين ؟؟
صادق : بقصة سيدنا لوط .. لما قال لقومه (يا قومي هؤلاء بناتي هن أطهر لكم قالوا أخرجوا آل لوط من قريتكم إنهم أناس يتطهرون)* .. بقي إللي عاوز يربي عياله علي الفضيلة يبقي متزمت .. وللا يعني علشان نبقي سبور تبقي دي حالتنا .
السيد : يعني نقفل علي عيالنا يا صادق .. لا يخرجوا ولا يدخلوا ولا يتعلموا .. بلاش نعيش حياتنا يعني علشان نبقي مسلمين؟؟
صادق : يا جماعة الإسلام عمره ما كان دين تضييق أو إضطهاد . ثم يا أخي ما تعيش حياتك بالإسلام . مصطفي : ومالها حالة بناتنا علي كدة يا صادق ؟؟
صادق : يعني مش عارف يا سي مصطفي ؟؟ مش عارف إن تقليدنا للغرب هو السبب في إللي إحنا فيه دلوقتي .. يعني بالله عليك عمرك كنت تسمع عن بنت أتخطفت أو تعرضت لحالة إغتصاب أو أتجوزت عرفي .. تعالي دلوقتي أقرأ علي صفحات الجرايد المصايب ورا بعض وده ليه لأن ربنا قال (ومن أعرض عن ذكري فإن له معيشة ضنكا)يا جماعة .. يا جماعة دي أجمل حياه .. حياة المسلمين الصادقين مع ربنا عز وجل .
السيد : ( بأسلوب فض المجالس) طيب يا صادق .. ربنا يكتر من أمثالك يا أخويا .. ربنا يقدم إللي فيه الخير
.صادق : (متأثرا) لا حول ولا قوة إلا بالله .
محمود : السلام عليكم ..إيه يا بني ؟؟ .. مالك يا صادق فيه إيه؟؟
صادق : كل حاجة بقي طعمها مر .. الظلم علي الأرض .. والمعاصي غرقتنا .. والذل كاسر راسنا وعينا .. والحمل بقي تقيل قوي يا محمود .
محمود : يا عم صادق ما كلنا في الهم سوا .. وللأسف بقي مش في بلدنا بس ده في كل بلاد المسلمين .. لسة دلوقتي مستلم إميل من صديق فلسطيني .. الشعب ده عجيب قوي .. حصار وتضييق وإعتقالات وإغتيالات .. ورغم كدة يا أخي صابرين ومقاومين وعايشين.. ونفس الأمر في الشيشان والعراق وغيرها من بلاد المسلمين.. ومحدش عارف أخرتها إيه .. إحنا بجد محتاجين حاجة تحصل .
صادق : فعلا إحنا محتاجين حاجة تحصل .. حاجة وسطنا نتلم حواليها وتشيل طعم المر إللي في حلقنا والذل إللي في قلوبنا .. عارف إحنا محتاجين إيه يا محمود ؟؟
محمود : إيه يا صادق ؟؟صادق : محتاجين سيدنا النبي .
محمود : صلي الله عليه وسلم .. يعني إيه مش فاهم .
صادق : أيوة .. إحنا محتاجين سيدنا النبي .. يا سلام يا محمود ... يا سلام لو نلاقيه داخل علينا دلوقتي .
محمود : ياه .. النبي .. في مصر .. في حارتنا .. في بيتي .. حلم جميل قوي يا صادق .. بس إزاي ؟؟
صادق : نفسي ييجي يا محمود .. نفسي يشوف المر إللي بتعانيه أمته من بعده .يا حبيبي يا رسول الله ..أنا.. أنا ..
محمود : هيه .. صادق .. أنا ماشي .. أشوفك علي خير ... السلام عليكم
صادق : وعليكم السلام ورحمة الله وبركاته ... (غارقا في حلم اليقظة) ويستمرلفترة حتي يأتيه صوت خارجي(عقله) : بتفكر في إيه يا صادق ؟؟ (نفسه المؤمنة) : بفكر أقول للناس إن سيدنا النبي جاي حارتنا علشان أشوف تأثير ده عليهم إيه(عقله) : وتفتكر الناس حتصدق الكلام ده ؟؟(نفسه المؤمنة) : مش عارف .. بس حاسس إن إحنا محتاجين ننكشف قدام نفسينا(عقله) : و حتي لو صدقوا حتكون إيه النتيجة ؟؟ تفتكر بكدة الناس حترجع لربنا ؟؟(نفسه المؤمنة) : أنا هأعمل إللي عليا .. وأنا والله نيتي في الخير .(عقله ) : علي بركة الله .
[ ينصرف صادق من المسرح ] ونسمع صوت خارجي ( أقرأ الخبر العجيب يا جدع .. النبي حايزور حارة الشرفاء يا جدع .... أقرأ الخبر)
محمود : صادق .. صادق .. سمعت الخبر العجيب ده ..
صادق : ( بإرتباك ) خير إن شاء الله
محمود : النبي حيزور حارتنا
صادق : إنت بتقول إيه يا محمود
محمود : زي ما بقول لك كدة .. الناس كلها بتتكلم في الموضوع (ينصرف)
صادق : اللهم دبر لنا فإننا لا نحسن التدبير (ينصرف)
( يدخل المعلم راضي و معه السيد ومصطفي وامين )المعلم راضي : النبي جاي .. معقولة دي يا ناس
السيد : الخبر صفحة أولي في بعض الجرايد
أمين : يا أخي ما أنت عارف إن فيه جرايد بتحب تهول
مصطفي : ولو الخبر طلع صحيح يا فالح ؟؟
المعلم : آه والله .. ده ربك قادر علي كل شئ ... وحدوووووه
السيد : لا إله إلا الله ... واد يا حمادة .. أنت يا مقصوف الرقبة
حمادة : نعم يابابا ..
السيد : أسمع يا حمادة .. جري علي البيت دلوقتي .. تقول لأمك بابا بيقولك نضفي البيت علي الآخر .. وتعمل أكل كويس .. أقولك .. خليها تجيب كتف ضاني .. سيدنا النبي كان بيحب لحم الكتف أوي .. ماشي ياواد
حمادة : حاضر يا بابا
السيد : أستني رايح فين .. تقول لخواتك و لأمك يحطوا حاجة علي راسهم ويلبسوا طويل ويخبوا كل اللبس المحزق .. أنت فاهم
حمادة : حاضر
السيد : استني يا يني آدم .. أنا لسة خلصت كلامي .. أنت حافظ أد إيه من القرآن ؟؟
حمادة : الحمد لله يا بابا .. حافظ سورة الفاتحة وباتلخبط في سورة الناس
السيد : نعم يا خويا .. أمال بتاخد إيه في المدرسة
حمادة : أصل الدين مش مادة أساسية يابابا
السيد : يا ليلة غبرة .. مش مادة أساسية إزاي يا فقري .. حنقول للنبي إيه ؟؟ طب الأحاديث ..
حمادة : أنا حافظ حديث واحد بس
السيد : حديث واحد .. طب سمع يا فالح
حمادة : قال رسول الله (صلي الله عليه وسلم) يا غلام سم الله وكل بيمينك وكل مما يليك
السيد : يعني حتي الحديث الوحيد إللي أنت حافظه بيكلم عن الأكل .. تعرف كم أسم من أسماء الصحابة ؟؟
حمادة : ما أعرفش إلا أسماء لعيبة الكورة يا بابا .. تحب أسمع ( الحضري وبركات ومتعب و......)
السيد : يالا بأقولك الصحابة تقوللي المنتخب .. بلاش .. تعرف إيه عن أبو جهل ؟؟
حمادة ( بخوف ) : انا ما أعرفش غير أبو تريكة يا بابا السيد : يا دي الليلة .. حنقول للنبي إيه ؟؟ حنقوله إيه لمّا يسأل العيال عن القرآن والسنة ؟؟؟؟
حمادة : أنا عندي فكرة يابابا ..
السيد : أتحفني يا فالح ...
حمادة : طيب ما تسمع له أنت
السيد : أسمع له أنا .. ما هي المصيبة إن أنا مش حافظ حاجة .. قدامي يا وش المصايب لما نشوف حنتصرف إزاي
أمين : بقول لك إيه يا معلم راضي .. خد الرشوة بتاعتك أهي .. أنا مش عاوز حاجة منك ..
المعلم : الله الله ليه كده يا باشا
أمين : يا عم أنا عاوز أقابل النبي وأنا إيدي نضيفة
المعلم : و أنا الفلوس دي هاروح أوديها لصحابها .. وأرجع للناس حقوقها إللي نهبتها منهم
أمين : يا نهارك مطين .. هي دي مش فلوسك
المعلم : بصراحة يا باشا لأ .. أنا أنا
أمين : أنت إيه .. مصيبة لتكون الفلوس دي مسروقة وللا مزورة
المعلم : ياريت
أمين : أمّال إيه ما تنطق
المعلم : الفلوس دي أموال اليتامي إللي أنا أخذت فلوسهم وبعت أرضهم ظلم .. أنا يا ما ظلمت وياما دُست علي ناس علشان أوصل للثروة والجاه ده .أيوة أنا مفيش حاجة معملتهاش .. يا تري لمّا أقابل النبي دلوقتي هأقوله إيه ؟؟؟
أمين : يعني كنت بتديني رشوة من مال حرام
المعلم : نعم يا خويا .. مال حرام .. بقي مزعلك إنه مال حرام و مش مزعلاك الرشوة
أمين : ما هو أنت قلت لي دي جاتوه وبعدين أنا كنت هأطلع منها حاجة لله
المعلم : ما ينفعش يا أخويا .. الله طيب ولا يقبل إلا طيبا
مصطفي : بقول لكم إيه .. أنا هأطلع جري دلوقتي علي أهل الشارع علشان ننضف الشارع ونرش مية ونعلق الزينة علشان النبي لمّا يوصل يلاقي حاجة تشرح القلب وتسر النظر
الشيطان : إيه إللي أنا بأسمعه ده .. النبي جاي .. أنا لازم أتأكد .. بس هأتأكد إزاي .. معندناش حد يسترق السمع دلوقتي .. بفرض إن الموضوع صحيح .. مجية النبي دي هتهد كل إللي أنا عملته من مئات السنين .. بس ده مش ممكن يحصل أبدا .. أنا لازم أعمل حاجة .. فين جنودي ؟؟ فين أعواني ؟؟ فين المحمول ؟؟؟ ....آلو أيوة يا شوشو يا زفت .. بقولك إيه سمعت الخبر إللي مالي البلد ..أيوة صحيح .. أسمع أشتغلهم بالتليفزيون يعني ميلودي ومزيكا وروتانا .. كله علي ودنه .. أرفع درجة الإستعداد يا شوشو .. تصحبك اللعنة .يبقي كدة أنا حاصرتهم بالتليفزيون والنساء وكسلتهم عن الصلاة .. ناقص إيه .. أيوة مافضيلش غير إني أقلب الحق باطل والباطل حق ( صوت الآذان ) آه الصوت ده بيقتلني .. مش قادر أستحمل .. لازم أبعد عن هنا
[ وبعد ثلاثة أيام ]
السيد : إيه الحكاية يا مصطفي بقالنا 3 أيام لا النبي جه ولا ظهر له أثر .
مصطفي : أنا زيك بالظبط يا سيد مش فاهم حاجة .
السيد : دأنا مكتف الولية وحارمها من الخروج ولبس الفساتين وماسك العيال عمال أحفظ فيهم أسماء الصحابة والأحاديث لمّا ريقي نشف .
مصطفي : وأنا من ساعة ما عرفت الخبر..ما أجيبش فرض علي أخوه وحتي قعدة المزاج لغتها وهديت الصومعة وياريت علي كده وبس دأنا علقت نور وزينة وجايب مزيكا آخر هيلامان وآخرها يطلع الموضوع إشاعة وكلام جرايد .
المعلم : سلام عليكم .. إيه النظام .. مفيش أخبار ؟؟
السيد : أبدا يا معلم ...
المعلم : أبدا يا معلم يعني إيه .. بقي بعد ما أسحب الرشوة و أرجع الفلوس لصحابها .. وأتبرع من مالي الخاص للمسلمين علشان ننصروهم تقول أبدا يا معلم سامع يا سي أمين
أمين : وأمين ماله بس يا معلم . ما أنا زيك ما عنديش فكرة
المعلم : حيث كده بقي مد إيدك بالصلاة علي النبي وخد حقك .. أنا بكرة من صباحية ربنا أجيبلك فلوس التبرعات أمين : الله ونصرة المسلمين يا معلم
المعلم : ربنا يتولاهم بقي ياباشا
محمود : السلام عليكم ورحمة الله وبركاته
المعلم : عاجبك إللي حصل ده يا سي محمود ... بقي بعد العمر ده كله ينضحك علينا كلنا بالشكل ده
محمود : يا جماعة أنا زيكم .. مش فاهم حاجة .. الخبر أنتشر في البلد كلها والناس كلها بتتكلم
السيد : طيب وحنعمل إيه دلوقتي ؟؟
محمود : أنا شايف إننا نستني صادق يمكن يكون عنده أخبار ... وأهو صادق جه أهو..
صادق : السلام عليكم
الجميع : وعليكم السلام ورحمة الله وبركاته
مصطفي : مالك يا أستاذ صادق ؟؟
المعلم : يا عم سيبه في حاله .. إنت مش عارفه بيحب سيدنا النبي أد إيه
السيد : أكيد هو زعلان كدة لما عرف إن النبي مش جاي
محمود : فيه إيه يا صادق ما تتكلم
صادق : النبي مشي
الجميع : نعم
صادق : سابلكوا رسالة ومشي
مصطفي : طب ليه دأنا جهزت كل حاجة في الشارع لإستقبال النبي
أمين : وأنا بقالي يومين .. قافل درج المكتب
السيد : ما إحنا جهزنا نفسنا ياجدعان وعملنا أحسن إستقبال
مصطفي : أنا مش فاهم إيه السبب
صادق : السبب إن النبي ملقاش الناس إللي كان عاوز يقابلهم
المعلم : أيوة .. إللي همّا مين بقي
صادق : النبي كان عاوز يقابل رجال من أمته
المعلم : لا إله إلا الله .. أمال إحنا ستات ما إحنا رجالة النبي ومن أمته
محمود : وكلنا كنا مستنينه يا صادق .. الرسالة دي فيها يا صادق
السيد : ما تتكلم يا أستاذ صادق
المعلم : فيها إيه الرسالة دي
(يخرج صادق الرسالة ويقرأها عليهم)
[ إن أمة محمد هي أمة الحق والعدل والرحمة .. إن أمة النبي هي أمة الرجال.. ورجال محمد هم الذين يتبعون سنته ..ويقتدون به.. إن رجال محمد هم رجال المحراب .. الذين يقيمون الصلاة ويحفظون شريعته... أما هؤلاء الذين تركوا صلاتهم وكشفوا نسائهم وضاع الحق بينهم ... فليسوا بأمةٍ وليسوا برجالي ]
محمود : علشان كدة النبي مشي
صادق : منكم لله ... منكم لله
أمين : وإحنا ذنبنا إيه بس يا أستاذ صادق ؟؟
صادق : ذنبكوا إيه ؟؟ .. أنت يا معلم راضي إزاي بتقول إنك من أمة النبي وأنت عمال تقدم رشوي وتاكل أموال الناس بالباطل وأنت يا أمين بيه يا أمين علي مصالح الناس إزاي بتحب النبي وأنت فاتح درج مكتبك بتمص دم الغلابة وللا أنت ياسيد ياللي ولادك مش حافظين القرآن وزعلان قوي إنك حرمت مراتك من لبس القصيرونسيت إن الحجاب فرض وأنت يا مصطفي ... عاوز تمشي تروح فين ؟؟؟
مصطفي : الله .. أظن أنا يا أخويا لا عندي عيل وللا متجوز .
صادق : أيوة .. لكن عمرك ما ركعت ركعة لله .. وفاكر بإن النبي حيفرح لمّا تقابله بشوية زينة ونور .. عرفتم ليه النبي مجاش؟؟ عشان مش أنتم إللي النبي عايز يقابلهم وللا عمره حيزوركم طول ما أنتم كدة ضايعين وتايهين وبعاد عن سنته وآدي النتيجة النبي مشي من غير ما نقابله
محمود : أد إيه كان نفسي أشوفه قوي ... كان نفسي أحضنه .. كان نفسي أبكي بين إيديه وأشكي له حالنا ..كان نفسي أقوله أد إيه أمته مهانة من بعده .. كان نفسي أقوله علي إللي بيجري في العراق والشيشان وفلسطين .. فلسطين .. بس كنت هاقوله إيه ؟؟ أقوله إنهم 58 سنة .. (مونولوج 58 سنة) ... أيوة القدس جوة في قلبنا يا رسول الله .. وحتفضل في قلبنا ليوم الدين ..
المعلم : وحتي لو سيدنا النبي جه .. كنت هأقوله إيه .. أقوله أنا مسلم بس في البطاقة يا رسول الله .. أقوله إني يا نصبت علي خلق الله .. يا ما كلت حرام ولا همنيش .. أقوله ماعملتش حساب اليوم إللي أقف فيه قدام رب العالمين .. سامحني يارب أنا غلطت وعهد عليا ما أدخل بيتي قرش حرام بس أغفرلي إللي فات إغفرلي إللي فات يا أرحم الراحمين .
مصطفي : وأنا كنت هأقولك إيه يا رسول الله أقولك إني من يوم ما وعيت علي الدنيا وأنا ماركعتش لله ركعة أقولك إني لمّا كنت بأسمع الآذان وأنا قاعد علي القهوة حاطط رجل علي رجل لا كنت باقوم أصلي مع الناس ولا حتي أنزل رجلي إحتراما للآذان .. أنا كنت مفتري قوي يارب كنت باكل من نعمك وما بآديش فرضك .. لكن عهد عليّا إني ما أسيبش فرض طول ما أنا عايش .. الرحمة يا رب .... الرحمة يارب
السيد : وأنا يارسول الله كنت حاقبلك إزاي وأنا الذنوب مغرقاني من ساسي لراسي .. عارف إن طريقك هو طريق الحق والخير والرحمة ورغم كدة رفضت إن بناتي يلبسوا الحجاب رغم إني عارف ومتأكد إن الحجاب فرض علي البنت زي الصلاة والصوم .. بس أعاهدك يارب إني أحجبهم وإذا جالهم عدلهم مش ممكن أوافق أبدا إلا علي راجل صاحب دين .. أستغفر الله العظيم رب العرش العظيم وأتوب إليه
أمين : لمّا كنت بأسمع حديث النبي صلي الله عليه وسلم إللي بيقول ( لعن الله الراشي والمرتشي والرائش) كنت بأقول لنفسي ياواد دي مش رشوة دي إكرامية دي تفتيح دماغ دي كادو وأنا عارف ومتأكد إنها رشوة وفلوس حرام ماليش حق فيها بس برضه كنت باخدها ودرج مكتبي ده ما كانش بيتقفل وكنت بتربح من منصبي الوظيفي .. إذاكنت جيت يارسول الله كنت حتقول عليّا إيه ... أستغفر الله العظيم وأتوب إليه .. توبة يارب توبة إن مديت إيدي علي مليم مش من حقي .. وأعاهدك يارب إني أقضي مصالح الناس كما تحب وترضي
صادق : سبحان الله .. يعني كان لازم أكدب عليكم وأقولكم النبي جاي علشان كل واحد يعترف بذنبه
الجميع : إيه تكدب علينا .. أنت يا صادق
صادق : أيوة أنا .. أنا إللي طلعت إشاعة مجئ النبي علشان كل واحد يتعري قدام نفسه ويعرف ذنوبه ومعاصيه .. ويعلم الله إن نيتي كانت في الخير
أمين : بالكدب يا صادق ... بالكدب
محمود : خلاص يا جماعة .. صادق متربي معانا وإحنا عارفينه كويس وأكيد كانت نيته في الخير ثم إيه النتيجة دلوقتي .. كلنا توبنا توبة نصوحة لله رب العالمين الجميع : ربنا يجازيك خير ياصادق .. جزاك الله خيرا يا صادق
محمود : يا إخوانا .. ياإخوانا نصرربنا جاي إن شاء الله بس محتاج مننا حاجة بسيطة قوي
الجميع : وإيه هي الحاجة دي يامحمود
صادق : إننا نبقي مسلمين بجد . لمّا سيدنا النبي صلي الله عليه وسلم مات قام سيدنا عمر وقال للناس من قال بأن محمدا قد مات فصلت رأسه عن جسده .. فرد عليه سيدنا أبو بكر بكل يقين في الله وقال من كان يعبد محمداً فإن محمداً قد مات ومن كان يعبد الله فإن الله حيّ لا يموت . يعني لزاما علينا نعبد ربنا حتي يأتينا اليقين
محمود : بدءاً بجيل سيدنا النبي صلي الله عليه وسلم ومرورا بجيل الصحابة الكرام والتابعين الأوفياء وإنتهاءً بآخر جيل بنقولها ...
جيل بعد جيل باقيين علي عهدنا أكبر مستحيل نخلف في يوم وعدنا ...
( أنشودة جيل بعد جيل )

وحشتنا يارسول الله
بنحبك من قلوبنا
[i]
@@فتى الظلام@@
@@فتى الظلام@@
.::عضو تفتخر به الادارة::.
.::عضو تفتخر به الادارة::.


الجنس : ذكر
الانتساب الانتساب : 11/09/2009
العمر العمر : 32
المساهمات المساهمات : 3152
نقاط التميز نقاط التميز : 4172
تقيم المستوى تقيم المستوى : 1

default رد: سيدنا محمد صلي الله عليه وسلم جاي يزور شارعنا

مُساهمة من طرف @@فتى الظلام@@ 2010-05-22, 9:53 pm

شكراا لك ويعطيك الف عاافية على مجهود الرائع
الإمبراطور
الإمبراطور
.::عضو تفتخر به الادارة::.
.::عضو تفتخر به الادارة::.


الجنس : ذكر
الانتساب الانتساب : 23/05/2010
العمر العمر : 32
المساهمات المساهمات : 2568
نقاط التميز نقاط التميز : 3638
تقيم المستوى تقيم المستوى : 2

default رد: سيدنا محمد صلي الله عليه وسلم جاي يزور شارعنا

مُساهمة من طرف الإمبراطور 2010-05-29, 9:19 pm

مــــــــشـــــكــــــور يااااااا غااااااالي

تســـلم الأيــادي

ابراهيم البدري
ابراهيم البدري
نائب المدير العام
نائب المدير العام


الدولة الدولة : على اسوار الخير
الجنس : ذكر
الانتساب الانتساب : 07/07/2009
العمر العمر : 30
المساهمات المساهمات : 3037
نقاط التميز نقاط التميز : 4342
تقيم المستوى تقيم المستوى : 13

default رد: سيدنا محمد صلي الله عليه وسلم جاي يزور شارعنا

مُساهمة من طرف ابراهيم البدري 2010-06-04, 12:31 am

سيدنا محمد صلي الله عليه وسلم جاي يزور شارعنا 206778



عاااااجل

للحصول على نتائج الدور التكميلي للصف السادس الاعدادي 
السادس العلمي والسادس الادبيلمحافظة صلاح الدين ونينوى
والانبار 2014والصف الثالث متوسط 
[ندعوك للتسجيل في المنتدى أو التعريف بنفسك لمعاينة هذا الرابط]

اي مشكلة واستفسار يرجى مراسلتي على الفيس بوك
[ندعوك للتسجيل في المنتدى أو التعريف بنفسك لمعاينة هذا الرابط]

smile28 smile28 smile28 smile28 smile28
الدعم الفني(خاص)
الدعم الفني(خاص)
الرقابة العامة


الجنس : ذكر
الانتساب الانتساب : 22/10/2009
العمر العمر : 32
المساهمات المساهمات : 3358
نقاط التميز نقاط التميز : 4527
تقيم المستوى تقيم المستوى : 15

default رد: سيدنا محمد صلي الله عليه وسلم جاي يزور شارعنا

مُساهمة من طرف الدعم الفني(خاص) 2010-06-18, 3:56 am

مشكورر

    الوقت/التاريخ الآن هو 2022-08-12, 8:31 am